Դեսպան Վահրամ Կաժոյանի մասնակցությունը «Vietnam National Brand 2023» համաժողովի պաշտոնական բացման արարողությանը։

20 ապրիլի, 2023

Ս.թ. ապրիլի 20-ին ՎՍՀ-ում ՀՀ դեսպան Վահրամ Կաժոյանը մասնակցեց «Vietnam National Brand 2023» խորագրով ամենամյա համաժողովի բացման հանդիսավոր արարողությանը, որը կազմակերպվել էր ՎՍՀ արդյունաբերության և առևտրի նախարարության Առևտրի խթանման գործակալության կողմից:

Համաժողովի հանդիսավոր արարողությանը բացման ելույթով հանդես եկավ ՎՍՀ արդյունաբերության և առևտրի փոխնախարար պարոն Չան Քուոկ Խանը : Իր ելույթում պարոն Չանը կարևորեց համաժողովի անցկացումը՝ հավելելով, որ 2018-2022 թթ. համաժողովին մասնակցող վիետնամական ընկերությունների թիվը տարեց տարի մշտապես աճել է: ՎՍՀ արդյունաբերության և առևտրի փոխնախարարը նշեց, որ 2023 թվականին համաժողովին մասնակցում են վիետնամական 50 ընկերություններ: Պարոն Չանն իր ելույթում նաև ներկայացրեց 2022 թվականին Վիետնամի կողմից արձանագրված հիմնական տնտեսական ցուցանիշները:

Համաժողովի բանախոսները ներկայացրեցին իրենց պատկերացումներն ու առաջարկությունները Վիետնամի կառավարությանը՝ «Վիետնամ» բրենդի աշխարհում հանրահռչակման նպատակով, ինչն իր հերթին կնպաստի վիետնամական արտադրանքի հանրահռչակմանը և զբոսաշրջության ավելացմանը:

Բանախոսներն իրենց ելույթներում նշեցին ազգային ապրանքանիշի իմիջի ձևավորման գործում՝ սպառողների վստահության ու հաշվետվողականության կարևորությունը, ինչպես նաև կանաչ էներգիայի, խելացի տեխնոլոգիաների օգտագործման անհրաժեշտությունն ապրանքների արտադրության ու վերամշակման գործընթացներում: Նրանք նաև կարևորեցին ազատ առևտրի միջազգային համաձայնագրերի շրջանակներում՝ մասնավորապես խաղաղօվկիանոսյան տարածաշրջանում համագործակցության համապարփակ և առաջադեմ համաձայնագրի և Եվրամիություն-Վիետնամ ազատ առևտրի համաձայնագրերի ընձեռած առավելությունների օգտագործումը:

«Vietnam National Brand 2023» համաժողովի բացման հանդիսավոր արարողությանը ներկա էին ՎՍՀ առողջապահության նախարարի պաշտոնակատար, նախարարի տեղակալ պարոն Դո Սյուան Տույենը, նախարարությունների ու պետական տարբեր գերատեսչությունների, ԶԼՄ-ների ներկայացուցիչներ, Վիետնամում հավատարմագրված դիվանագիտական ներկայացուցչությունների ղեկավարները և ներկայացուցիչները, օտարերկրյա և վիետնամական համալսարանների ղեկավարներ, դասախոսներ ու այլ մասնակիցներ:

Համաժողովին ներկա էր նաև ՀՀ դեսպանության երկրորդ քարտուղար Արամազդ Մուրադյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր